නමක් නැති කඳු

නමක් නැති කඳු දෙහිස  හුඟක් ඈතින්                    පෙනෙන
දුරක් එකිනෙක අතර තබාගෙන මල්                         දරණ
බරක් හිස දරා මුත් දනක් නොනමා                         නැගෙන
නමුත් ඉඳහිටක පිණි කඳුළු නිම්නෙක                       රඳන


වතාවක් දෙකක් අවවාදයක් දී                                  සුළඟ
සිනාවක් කතාවක් නැතිව රුදු වී                               ගියද
ඉටා ගත් දිනෙක එකලඟ තැබුණු කඳු                    දෙහිස
පමාවක් ලද සැනින් සිඹ සනසවති                           උනුන

03.06.2020

                 

මට මහන්සියි දැන්

කඳුළු පේලි අපිළිවෙලට ඇමිණු
තැනින් තැන තාම සුසුමින් තෙත්
සෑම දුක්බර කවියටම
සිනා මල් පලඳමි
'තව ටිකක් ඉවසන්න නාඬා'
හෙමින් රහසින් පවසමි


දුක්බරව මියයන හදවතේ
තැනින් තැන
රෝස පෙති අලවමි
'හැමදේම හරියයි හෙමිහිට'
කණ්නාඩියේ අඬන ළමයා රවටමි

තාලය නොදත් ගීයක මැදක
 වැරදී ලියූ  ස්වරයක
ජීවත් වීම පහසු නැත
සිනාසී පහසු බව හැඟවීම පහසු නැත


කඳුළු රහසින් මල්පෙති මතින් තැවරීම
පිණි බින්දු යයි ඔබට බොරු කීම

ආදරය
අඳ  ගොළු බිහිරි බැව්
දිගින් දිගටම  ඇඟවීම ..

ගසක් කවියෙක් අස

මම ගසක් ඔබ අස 
වදනකුදු නොබිඳින 
ඔබෙ සිනා දැකුමට 
ඇස යොමා හිඳ සැනසෙන 

මම ගසක් ඔබ අස 
පවනින් මවන ගී සර 
ඔබව පෙළනා ඉර 

මඩින ලෙස අතු පතර විහිදන 

මම ගසක් ඔබ අස
ඔබෙ විඩාපත් දෙනයන
මදක් සනසන රිසියෙන
හැකි පමණකින් කුසුම් පූදන

මම ගසක් ඔබ අස
ඔබෙන් පමණක් සැනහෙන
ඔබ මා නොහඳුනන
වග කැමැත්තෙන් කරන අමතක 

මම ගසක් ඔබ අස 
ඔබේ කවි සිත පසසන 
ඇයට ලියනා කවි පද 
ළසෝ ගින්නෙන් ඉවසන 

මම ගසක් කවියෙක් අස 
සෙමෙන් නිහඬව මියයන... 
CN