වදරිං හයිට්ස්

වැළඳ ගමි සෙනෙහසින් මරණය
අවසන් හුස්මටද ඇලුම් කරමින්
සීරුවෙන් සිඹිමින් මතකය

සොයමි
කවුලුවෙන් දුර ඈත තණ බිමේ
කෙළිදෙලෙන්  ඇවිද ගිය
තටු ලැබී
පෙරඹරට ඉගිල ගිය
ප්‍රීතිමත් ඔබ හා මම

හිම මිදුන
සියල්ලම ගල්  ගැසුණ සිසිරයක
අපේ මුලකුරු කෙටූ
ඕක් ගස වඩෙනු  ඇත
තණ බිමේ  මල් පිපෙනු  ඇත
නමක් නැති කුරුල්ලන් ගයනු ඇත

මා ඔබට වෛර කල තරමටම යලි ප්‍රේම කරනු ඇත
මා නිදන නිම්නයෙහි වසන්තය රැඳෙනු ඇත

2009

වාදකයාණෙනි.

චංචල  යැ  දිගැස
රතුපුල්  වැ ලවනත
නිසයුරු අඹරත
කෞමදකරය ඇහැරෙත  

යොහොඹු කොඳ  රුඳි යහනත
ඇත බලා  වැ නිකසල
මුත් නුඹැති මිණි වෙණ
බිඳලයි මෙමා හද වෙණ  

නගන කල සත්සර
නා මෙණවීන් තුටු කොට
බිඳෙයි හද වෙණ  තත
ඇදුරු පෙර තත් නැසූ විලසින 

පෙර නූගත් රාග
ඈ කොට නොයෙක් සිප් කඳ
පෙර නුඹ නොලද සර
උගන්නට මෙහි එනු මැන   

සුණු කොට නුඹැති වෙණ
හිස් දෑතින් පැමිණ
රුගෙන මා හද වෙණ
නගත මැන නෙක මිහිරි සත්සර

සරත් කල නිම කොට
වසත් සුව ගෙන එනු මැන
නොදත් මුත් සත්සර
විඳිමි නුඹ හද වෙණ සදන සුව  
    

2008

සයුරට බැඳි පෙම

පුලින තලාවක
වැතිර බලාඉමි
සුනිල නුවන් යුග
සිනා ඉසින සැටි

සිනිඳු සුනිල නිල්
දියවල් සැලි සැලි
ඔබේ සිනා රුල්
සිහිකරවන හැටි 

පුලින තලාවක
වැතිර බලාඉමි
මගේ මතක පොත
ගොඩට ගසන හැටි

 මුතුබෙලි කටුවක
පෙරදින සැඟවූ
රහස් කතා මුතුවකට
හැරෙන හැටි 

පුලින තලාවක
වැතිර බලාඉමි
නුඹව සොරාගත්
සිඳු නංවන සිරි

26/12/2009